FFLIW’R MOCH
Mae’r sefyllfa fydeang parthed lledaeniad ffliw, ac yn enwedig A/H1N1 (“Ffliw’r Moch”), yn peri pryder i lawer.
Cyfarwyddyd i Eglwysi
Yn ddiweddar, cyhoeddodd y Llywodraeth, trwy ei Hadran Cymunedau a Llywodraeth Leol, gyfarwyddyd – a ysgrifennwyd mewn ymgynghoriad â chynrychiolwyr cymunedau ffydd – ar effeithiau posibl pandemig ar weithgareddau cymunedau ffydd, a sut y gallent gynnal cymunedau ehangach pe digwyddai hynny. Dosbarthodd esgobion yr Eglwys yng Nghymru y cyfarwyddyd hwn i bob clerig, ynghyd â chyngor penodol a gweddïau i’w defnyddio’n bersonol ac ar goedd yn yr eglwys yn ystod y pandemig. Mae’r esgobion wedi diweddaru ac ailddosbarthu eu cyngor i’r plwyfi ers cyfarfod 16-17 Medi 2009 o’r Corff Llywodraethol.
Gofynnwyd i bob plwyf ystyried sut orau i ymateb i’r sefyllfa bresennol gan gymryd i ystyriaeth y cyngor diweddaraf oddi wrth y Llywodraeth a’u hesgob a’r cyd-destun/sefyllfa leol. Er enghraifft, wrth weinyddu’r Cymun Bendigaid yng nghyfarfod y Corff Llywodraethol ar 17 Medi, rhoddwyd dewis i’r aelodau i dderbyn y bara a’r gwin neu ddim ond y bara. Defnyddiwyd hylif golchi dwylo gwrth-facteria gan bawb yr oedd a wnelont â gweinyddu’r elfennau. Mae Mainc yr Esgobion yn adolygu’r sefyllfa’n gyson, a rhoddir cyfarwyddyd newydd i blwyfi fel y bydd y sefyllfa’n newid.
Gellir lawrlwytho’r holl adnoddau ar y pwnc hwn drwy ddefnyddio’r dolennau ar y chwith.